ជប៉ុន៖ ទីក្រុង Brisbane រដ្ឋ Queenlands ប្រទេសអូស្រ្តាលីនឹងធ្វើជាម្ចាស់ផ្ទះរៀបចំការប្រកួតកីឡាអូឡាំពិកនិងប៉ារ៉ាឡាំពិកឆ្នាំ ២០៣២  នេះបើតាមសេចក្តីប្រកាសផ្លូវការរបស់គណៈកម្មាធិការអូឡាំពិកអន្តរជាតិ IOC។​ ​ ការប្រកាសរបស់ IOC នៅទីក្រុងតូក្យូនេះក៏មានការអបអរសាទរពីប្រតិភូអូឡាំពិករបស់អូស្រ្តាលី រួមជាមួយការនឹងការត្រៀមលក្ខណៈអបអរបាញ់កាំជ្រួចនៅទីក្រុង Brisbane។

ការទទួលបានសិទ្ធិរៀបចំព្រឹត្តិការណ៍អូឡាំពិក ឆ្នាំ២០៣២ លើកនេះគឺជាលើកទី ៣ ដែលហើយដែលប្រទេសអូស្រ្តាលីទទួលសិទ្ធិរៀបចំការប្រកួតព្រឹត្តិការណ៍ពិភពលោក ៤ឆ្នាំម្តងនេះ បន្ទាប់ពីធ្លាប់រៀបចំពីរដងក្នុងឆ្នាំ ១៩៥៦ ទីក្រុង Melbourne និងឆ្នាំ ២០០០ ទីក្រុងស៊ីដនី។

ក្រៅពីប្រទេសអូស្រ្តាលី នៅមានប្រទេសផ្សេងទៀតដូចជា ប្រទេសឥណ្ឌូនេស៊ី ចិន កាតា ហុងគ្រី និងអាល្លឺម៉ង់ជាដើម សុទ្ធតែបានចូលរួមប្រជែងដេញថ្លៃរៀបចំព្រឹត្តិការណ៍អូឡាំពិកក្នុងប្រទេសរបស់ខ្លួនដូចគ្នា។

សូមបញ្ជាក់ថា បន្ទាប់ពីបញ្ចប់ព្រឹត្តិការណ៍អូឡាំពិក ទីក្រុងតូក្យូ ឆ្នាំ២០២០ ដែលលើកមកលេងឆ្នាំ ២០២១ នេះ ព្រឹត្តិការណ៍អូឡាំពិករដូវក្តៅនឹងបន្តធ្វើដំណើរទៅកាន់ទ្វីបអឺរ៉ុប នាទីក្រុងប៉ារីស ប្រទេសបារាំង ឆ្នាំ២០២៤​ បន្ទាប់មករៀបចំនៅទ្វីបអាមេរិក នាទីក្រុង ឡូស អេនចេឡេស សហរដ្ឋអាមេរិក ក្នុងឆ្នាំ ២០២៨ មុននឹងមកដល់ទ្វីបអូសេអានី ក្នុងទីក្រុង ប្រីសបាន ប្រទេសអូស្រ្តាលី ក្នុងឆ្នាំ២០៣២៕